- Tíðindi, mentan og ítróttur
Góðan morgun Føroyar
Formaðurin í Reyða Krossi, Jóannes Eidesgaard og ársins fyrstuhjálparar 2016 vitjaðu morgunsendingina, og greiddu nærri frá hendingini tann 27. apríl 2016.
Grundgevingin hjá Reyða Krossi er hendan:
Tveir mans fingu heiðurin “Ársins fyrstihjálpari 2016” av Reyða Krossi Føroya
Hesir eru Hendrik Vilhelm Joensen úr Kollafirði og Suni Hermansen av Signabø.
Teir fingu heiðurin fyri at hava megnað at givið lívbjargandi fyrstuhjálp, bæði kropsliga og sálarliga, í eini truplari støðu, tá 19 ára gamli starvsfelagi teirra small um.
Hendingin fór fram tíðliga um morgunin tann 27. apríl 2016 í Kaldbaksfirði, har tríggir starvsfelagir fingu sær kaffi inni á landstøðini hjá alibrúkinum hjá Bakkafrost. Knappliga small 19 ára gamli Fróði Emil Hansen um, og datt niður á gólvi.
Í støðuni kláraðu Hendrik og Suni at geva Fróða lívbjargandi fyrstuhjálp, ringja 1-1-2, syrgja fyri, at familjan hjá Fróða fekk at vita um tilburðin, og syrgja fyri, at teir sjálvir fingu sálarliga hjálp aftaná. Hetta vísir, at teir høvdu yvirskot til at hugsa um tann skadda, familjuna og seg sjálvar.
Framfaringarhátturin, hvussu teir báðir skipaðu fyrstuhjálpina vísir, hvussu týdningarmikið tað er at hava tikið eitt fyrstuhjálparskeið, hvussu farast skal fram í eini tílíkari truplari støðu.
Út frá hesum hava teir heiðurin uppibornan at verða útnevndir til “Ársins fyrstuhjálparar 2016”