Dreymar við havið er eitt coming-of-age-drama, sum tey siga. Ikki bara ein ungdómsfilmur, men eisini ein leitan eftir samleika í tannáringa skeiðanum, og ein sosialur kommentarur um korini at vaksa upp í einum samfelag sum okkara.

Og hetta er ikki bara sum um. Hetta er føroyskt. Uttan undirtekst, tí málið er okkara. Tí verður hetta eisini ein politiskur boðskapur, eitt statement í sjálvum sær, um føroyska filmsgerð og hvussu langt hon er komin.

Dreymar við havið er eitt so stórt stig framá í føroyskri filmsgerð, at hann tekur allar stjørnur, ið tøkar eru. Fult stigatal.

Hetta er eitt búgvið coming of age drama uttan beiskleika; men poetiskt; eitt ungdómsdrama, sum letur seg upp, sum Ester sigur, og verður borið av einglum, fyri at vera í terminologiini hjá handritahøvundinum, Marjun Syderbø Kjælnes.

Soleiðis sigur Birgir Kruse millum annað um nýggja føroyska spælifilmin "Dreymar við havið".