Lønin er ov lág, arbeiðstíðirnar ólagaligar og arbeiðið er bæði strævið og ótakksamt.

Hesar eru nakrar av niðurstøðunum í eini kanning, sum felagið Føroysk Miðlafólk hevur gjørt um fjølmiðlafólk í Føroyum.

Støðulýsingin vísir eitt nú, at útvið helvtin av teimum, sum hava eina journalistiska útbúgving, gera okkurt annað enn at arbeiða sum journalistar á einum fjølmiðli.

At ágangur og hóttanir eru partur av journaliststarvinum, vísir støðulýsingin eisini. Meir enn ein triðingur av teimum, sum hava ella hava havt sína yrkisleið á einum fjølmiðli, hava kent seg vera fyri ágangi ella illa viðfarnan í sínum starvi í føroyska miðlaheiminum. Fimti hvør hevur kent seg beinleiðis hóttan.

Í morgunsendingini greiddi formaðurin í felagnum Føroysk Miðlafólk frá um støðulýsingina.