Ræðist tú klovnar, er hetta ikki tann lættasta tíðin, tí seinastu vikurnar hevur filmurin IT gingið í biografunum bæði uttanlands og her heima.

Talan er um ein gysara, og er grundaður á romanina við sama navni eftir Stephen king. Filmurin snýr seg um nøkur børn, ið berjast móti tí ónda, og tað er har at klovnurin Pennywise kemur inn í myndina.

Av tí at filmurin gongur í biografunum júst nú, so eru myndir av óhugnaliga klovninum at síggja rættiliga nógva staðni á netinum og í sjónvarpinum. Og tað hóvar ikki teimum, ið hava klovnafobi.

Í morgunsendingini greiddi Erling Fles, sálarfrøðingur, frá klovnafobi.

- Ert tú blivin kløkkur av einum klovni, kann tann upplivingin hava sett seg so mikið fast, at tú fært ein ótta fyri klovnum. Altso eina fobi, sigur Erling Fles.

Sambært honum er tað ikki so løgið, at summi fólk - bæði børn og vaksin - ræðast klovnar.

- Tað er eitt sindur tað sama við jólamonnum, tí tá tað er okkurt slag av eini masku, er ikki eins lætt at avlesa andlitsbrøgdini, og persónurin hevur kanska eisini ein annan verumáta enn flest onnur fólk, sigur Erling Fles.