- Sparingar í heilsuverkinum gera, at ljósmøður jú ikki hava óavmarkaða tíð til barnakonur. Og tíð er júst tað, sum vit hava í Ljósmøðrahúsinum.

Soleiðis sigur Bjørt Joensen Dahl, sum saman við Rannvá Simonsen og Anniku Hoydal hevur stovnað Ljósmøðrahúsið.

Tær eru ljósmøður og hava tilsamans fleiri ára royndir sum ljósmøður.

- Hetta skal vera eitt stað, har barnakonur kunnu koma í viðgongutíðini til tær vanligu kanningarnar og eisini aftan á føðing, tá tær hava tørv á hjálp við eitt nú bróstageving og so framvegis, sigur Rannvá Simonsen.

Enn ber ikki til at gera skanningar ella at kvinnur eiga í Ljósmøðurhúsinum, tí fyrst og fremst snýr hetta seg um at veita stuðul og geva ráð. Serliga til tær kvinnurnar, ið onkursvegna kenna seg einsamallar.

- Tað eru nógvar kvinnur í føroyum, sum eru rættiliga einsamallar og hava einki sosialt netverk, og hesar kvinnurnar hava veruliga tørv á at blíva loftaðar og hjálptar, sigur Rannvá Simonsen.

Í morgunsendingini greiddu Rannvá Simonsen og Bjørt Joensen Dahl frá Ljósmøðrahúsinum.