Í morgin 25. november er altjóða dagur móti harðskapi móti kvinnum.

Í apríl mánaði í ár kom tilhaldslógin, eisini kend sum stalkaralógin, í gildi, og sostatt hevur lógin verið galdandi í hálvt ár.

Lógin hevur til endamáls at gera tað lættari at verja fólk móti ágangi, forfylging og stalking.

- Sum vit hava skilt á løgregluni, so siga tey, at tey hava brúkt lógina til tilhald hetta seinasta hálva árið, og og tað er eitt uppihaldforboð sum er givið sambært lógini, sigur Gudrun Mortansdóttir Nolsøe, løgfrøðingur á lógartænastuni á løgmansskrivstovuni.

Tøl frá løgregluni frá 2011 til 2015 siga, at hatta tíðarskeiðið varð biðið um 49 tilhald.

- Tað sá út til, at tey tølini vóru vaksandi. Í 2016 vóru ikki færri enn 16, sum bóðu um tilhald, sigur Gudrun Mortansdóttir Nolsøe, men leggur afturat, at høga talið í 2016 ivaleyst er ávirkað av, at heildarætlanin bleiv sett í verk tá.

- Samanumtikið haldi eg, at lógin hevur ta ávirkanina, at hon virkar fyribyrgjandi, sigur Gudrun Mortansdóttir Nolsøe.

Í morgunsendingini greiddi hon frá tilhaldslógini.