- Tíðindi, mentan og ítróttur
Góðan morgun Føroyar
Við skúlaársbyrjan í fjør fóru 42 lærarar á skúlabonk. Talan er um skúlastjórar, varaskúlastjórar og lærarar, ið hava ætlanir um at bjóða seg fram sum skúlastjórar.
Útbúgvingin er samskipað ískoytisútbúgving og diplomútbúgving í námsfrøðiligari leiðslu.
Mentamálaráðið hevur sett Súsonnu Olsen, námslektara á Fróðskaparsetrinum, at samskipa útbúgvingina, sum er 2,5 ár til longdar.
- Nútímans skúlastjórar skulu fyrst og fremst vera professinonellir. Teir skulu vera vælútbúnir og ajourførdir við nýggjastu granskingina á økinum. Eisini skulu teir vera sosialt væl fyri, tíma at leiða og tora at taka avgerðir, sigur Súsanna Olsen.
Tað hevur verið eftirspurningur frá skúlastjórum og lærarum um eina slíka útbúgving, sum nú er byrjað.
Ein, sum er farin undir hesa útbúgvingina, er Regin Marnersson, ið er skúlastjóri á Skúlanum á Fløtum.
- Eg eri fyrst og fremst farin undir hesa útbúgvingina, tí eg haldi, at tá mann situr í einum leiðandi starvi, hevur mann brúk fyri at fáa innspark alla tíðina og íblástur. Og tað kann mann gera millum annað við at fáa sær eina slíka útbúgving, sigur Regin Marnersson og heldur fram:
- Fyrsta motivatiónin at fara undir hesa útbúgvingins er menningin við at kunna gera tað arbeiðið, eg geri, enn betri, sigur Regin Marnersson.
Í morgunsendingini greiddu tey bæði frá útbúgvingini.