Tann 29. januar skulu tvær gentur frá skúlanum á Giljanesi luttaka á árliga Ungdómstinginum, sum verður á Christiansborg 29. januar.

Tær báðar Kristina Nattestad og Nikolina Ravnsfjall hava saman við flokki sínum seinastu mánaðirnar arbeitt við einum uppskoti, sum tær skulu leggja fram á árliga Ungdómstinginum, sum verður í Keypmannahavn seinast í hesum mánaðinum.

Uppskotið, tær fara at leggja fram, snýr seg um at fáa sjúkuna anoreksia á tímatalvuna.

- Tað er nógv frammi í tíðini, og vit hoyra ofta um tað. Men vit vita bara alt ov lítið um hesa sjúkuna. Tí halda vit, at tað átti at verið ein fastur partur av undirvísingini í lívfrøði, siga tær báðar, Kristina og Nikolina.

Saman við lærara sínum, Inga Wiberg, vitjaðu tær í morgunsendingini og greiddu nærri frá uppskotinum.