Seinastu vikurnar hava vit kunna fylgt við í lívinum úti í Fugloy.

Í kvøld verður triði og seinasti partur av sendingini um Fugloynna, sum Anders Lund Madsen hevur gjørt saman við Danmarks Radio.

- Eg valdi at gera sendingarnar um júst Fugloynna, tí eg hevði ongantíð verið har fyrr, og harafturat haldi eg, at tað er har, at Føroyar eru allarmest føroyskar, sigur Anders Lund Madsen, sum annars hevur verið í Føroyum í fleiri umførum seinastu 25 árini.

Upptøkurnar fóru fram seinasta summar, og við sær á ferðini hevði kendi sjónvarpsverturin eisini familju sína.

- Vit gjørdu ikki so øgiliga nógv, tá upptøkurnar vóru lidnar um dagarnar. Vit sótu og hugdu, gingu eitt sindur runt, og tað var tað, sigur Anders Lund Madsen, sum dámar væl hetta slagið av sjónvarpi:

- Mær dámar væl at loyva vanligum fólkum framat í sjónvarpi. Úrslitið blívur ofta gott, heldur Anders Lund Madsen fyri.

Skuldi hann gjørt enn eina sending um onkra oyggj ella bygd í Føroyum er hann skjótur at svara:

- Eg havi ongantíð verið í Suðuroy, og eg havi hoyrt, at fólkini har eru øðrvísi, so tað vil eg fegin kanna. Eisini kundi eg hugsað mær at farið í Kallsoynna og Mykines, sigur Anders Lund Madsen.