- Tíðindi, mentan og ítróttur
Góðan morgun Føroyar
Frá 7. til 9. september verður Útilív Adventure Festivalur í Føroyum.
Theo Larn Jones, sum er úr London, greiðir frá, at hann vitjaði í Føroyum og var bergtikin av landi og fólki.
Hann hevur áður skipað fyri fleiri rennitiltøkum, og fekk alt fyri eitt hug at stíla fyri einum tiltaki í Føroyum.
Festivalurin hevur fingið heitið Útilív, og fer at fevna um fýra ymiskar fjallarenningar. Stytsta er 13 kilometrar og longsta er eitt ultramarathon, ið er 65 kilometrar til longdar. Á øllum teinum verður fólk at taka sær av rennarunum, um brúk skuldi verið fyri tí.
Sarah Pritchard vísir á, at tað er hart og rættiliga nógv øðrvísi at renna í fjøllunum enn á sløttum, og tí vendir hetta tiltakið sær til fólk, ið hava runnið í fjøllunum áður.
Tey vóna at eini 240 rennarar vera við - bæði føroyingar og útlendingar.
Umframt rennng verður eisini ymiskt annað, sum fólk kunnu royna. Eitt nú at sigla í kajak, síða, surfa og ganga í fjøllunum.
Tey leggja dent á, at umhvørvisspurningurin hevur stóran týdning í tí tey gera, og tí er samstarv fingið í lag við felagsskapin Ringrás.
Tað er Theo Larn Jones úr Onglandi, sum hevur tikið stig til festivalin, sum verður gjørdur í samstarvi við Visit Faroe Islands, Mikkeler, Føroyskir fjallabjargarar og Hans Mikkelsen.
Unnusta Theo, Sarah Pritchard, leggur renningina til rættis.
Mera kann lesast um Útilív Adventure Festival á facebooksíðuni og á heimasíðuni.