Framtak er ein felagsskapur fyri rættinum at velja kannabis, sum er stovnaður fyri at stuðla uppskotinum hjá Jenisi av Rana, um at lata føroyingar luttaka í donsku royndarskipanini við medisinskum kannabisi.

Royndarskipanin hjá danum loyvir donskum kommunulæknum at útskriva kannabis sum heilivág til ávísar sjúklingar.

Framtak ætlar eisini at savna undirskriftir inn og gera ein uppstillingarlista til næsta Løgtingsval, sum skal arbeiða fyri rættinum at velja kannabis.

Hallur Djurhuus og Katja Simonsen, sum eru tveir av stigtakarunum til Framtak, vitjaðu morgunsendingina. Katja Simonsen livir eisini við eini kroniskari sjúku, sum hevur nógva pínu við sær, og hon kundi sjálv hugsað sær at nýtt kannabis sum heilivág. Hon hevur royndir við tí uttanlands, og tær royndirnar eru sera góðar.