- Tíðindi, mentan og ítróttur
Góðan morgun Føroyar
Í gjár stroymdi Sonja Jógvansdóttir, løgtingskvinna, beinleiðis á Facebook. Fólk kundu seta spurningar, gera viðmerkingar o.a. ta løtuna, hon stroymdi. Evnið var pensjónir. Hetta er ógvuliga vanligt hjá kendum fólkum, politikkarum, aktivistum o.s.fr. at gera uttanlands, men vit hava ikki sæð nógv av hesum í Føroyum.
Niels Uni Dam, sum eigur Nudlavirkið og hevur fingist við samskifti í nógv ár, sigur, at hetta fer at merkja framtíðina. Hann ivast ikki í, at politikkarar og onnur fara at nýta henda møguleikan oftari og oftari, tí hetta letur upp fyri interaktión við veljarar og fólk á Facebook.
- Tá man samskiftir á henda hátt, so kunnu veljararnir vera um alt landið, og politikkarin fær feedback beinanvegin. Hetta krevur heldur ikki eins nógv og onnur forum, tí tað er góðtikið, at upptøkan er eitt sindur óprofessionell, sigur Niels Uni Dam.
Niels Uni Dam vísir eisini á, at Facebook er broytt, soleiðis at síðir noyðast at framleiða meira engagerandi tilfar framyvir.
Interaktiónir á sosialum miðlum vísa seg at vera góðar fyri fólk, meðan passiv hyggjan at sjónbondum ella lestur av greinum, ikki hava somu jaligu ávirkan. Tí verður tilfarið, ið vit síggja í okkara floymi framyvir, tilfar, sum skapar interaktión, kjaks, gleði o.s.fr. At stroyma og aktivera fylgjarar er dømi um slíkt engagerandi tilfar.