- Tíðindi, mentan og ítróttur
Góðan morgun Føroyar
Seinastu tvey hóskvøldini hava vit fylgt við í lívinum hjá Eyðuni Ásason, sum hevur sjúkuna Parkinson.
Fyri trimum mánaðum síðani bleiv hann lagdur undir skurð, har fýra elektrodur blivu settar inn í heilan. Elektrodurnar gera, at Eyðun Ásason livir betur og ristist so at siga als ikki, soleiðis sum hann gjørdi áðrenn skurðviðgerðina.
Eyðun Ásason sigur, at tað var ein løgin kensla at síggja seg sjálvan á skíggjanum.
- Sjálvur visti eg ikki, at eg var so sjúkur í veruleikanum. Hetta er fyrstu ferð, at eg sá, hvussu onnur hava sæð meg, og tað var øgiliga løgið, sigur Eyðun Ásason.
Somuleiðis var tað heilt serligt fyri unnustuna at síggja Eyðun í teimum báðum sendingunum:
- Vit sóu hann ikki so sjúkan, sum vit sóu í sjónvarpinum. Tí hevur tað eisini verið løgið og kensluborið at síggja hesa sendingarnar, sigur Jeanette Joensen.
Síðani skurðviðgerðina er lívið bara blivið betri.
- Í dag havi eg tað sum eitt nýtt menniskja, staðfestir Eyðun Ásason, og hetta kann unnustan, Jeanette Joensen, eisini skriva undir uppá:
- Hann hevur fingið mót upp á lívið, sigur Jeanette Joensen.
Í morgunsendingini greiddu tey bæði frá nýggju tilveruni, nú Eyðun er blivin skurðviðgjørdur.