Fyri 100 árum síðani høvdu nógvir føroyingar sama navn. Børn fingu navn eftir hvønn dag, tey vóru fødd, og so kundu tey ofta hava heilt upp í átta fornøvn.
Hetta vísir ein stór ritgerð, sum Elinborg Osvaldsdóttir hevur gjørt.
Hon hevur kannað føroysk fólkanøvn í tveimum ymiskum tíðarskeiðum og hevur síðani samanborið tey.
- Fyrr var tað ofta soeliðis, at tey somu nøvnini gingu aftur, tí har var ikki so nógv at velja ímillum. Og harafturat var tað ógvuliga vanligt at uppkalla, sigur Elinborg Osvaldsdóttir.
Hóast nógv er broytt hesi seinastu 100 árini, so er tað tó eitt, sum enn er galdandi:
- Nøvnini Jákup og Maria blíva við at vera populer, tí tey vóru nógv brúkt í fyrra tíðarskeiðinum, eg havi kannað, og eru eisini í dag nógv brúkt, sigur Elinborg Osvaldsdóttir.
Í morgunsendingini fortaldi hon um MA-ritgerðina og um fólkanøvn í Føroyum.