Fyri at koyra taxakoyring í Føroyum krevst loyvi, men kortini eru fleri, sum koyra ólógliga taxakoyring.

Tað veit heimasíðan local.fo, sum skrivar tíðindi úr Føroyum á enskum, at siga.

Í greinini er viðtal við bilførara í 20unum, ið vil vera dulnevndur.

Viðkomandi hevur koyrt ólógliga hýruvognskoyring í eini tvey ár, og førarin veit um fleri onnur, sum gera tað sama.

- Tey flestu seta seg í samband við meg um facebook, men onnur ringja, tá tey skulu koyrast, sigur førarin.

Heðin Joensen, stjóri í Bil, váttar, at teirra førarar javnan síggja, at fólk, ið ikki hava loyvi til tess, koyra hýruvogn.

Trupulleikin tykist vinda upp á seg.

Eisini Petur Hentze, sum koyrir bil nummar eitt hjá Auto, hevur bitið merki í, at fleiri koyra ólógliga hýruvognskoyring.

Hann hevur fleiri ferðir gjørt vart við tað hjá myndugleikunum, men enn er einki hent.