- Tíðindi, mentan og ítróttur
Góðan morgun Føroyar
Vágaportalurin skrivar á heimasíðu sínari, at teimum dámar ikki at seta upp múrar og krevja gjald fyri at sleppa inn. Vágaportalurin vil, at øll skulu sleppa framat tilfarinum, ikki bara tey sum gjalda. Tí biðja teir lesaran umhugsa at stuðla.
Hetta er nýtt at gera á netmiðlum í Føroyum, men uttanlands gera fleiri miðlar tað, m.a. enski miðilin the Guardian. Gunnar Skúvadal, journalistur, sum eigur Vágaportalin og Øssur Winthereig, journalistur og næstformaður í Føroyskum Miðlafólkum, skiftu orð um evnið í morgunsendingini.
Gunnar Skúvadal sigur, at teir vilja geva hesum eina roynd, tí tað er trupult at klára seg fíggjarliga hjá netmiðlum. Vágaportalurin byrjaði uppá hetta 21.02.18, so enn er ov tíðliga at siga, um hetta hóskar seg í Føroyum, og um føroyingar tíma at stuðla á henda hátt.
Øssur Winthereig heldur, at miðlar sum heild hava tað trupult, sum eisini er tí, at almennur miðlastuðul varð latin fleiri miðlum fyri fyrstu ferð í fjør. Øssur heldur tó, at um tilfarið er gott, so vilja fólk gjarna tekna hald til miðlar, tí vit hava nógv hald av ymiskum slagi í dag.