Sir Roger Bannister, sum var fyrsti maður at renna ensku mílina undir 4 minuttir, doyði leygardagin, 88 ára gamal.

Enska mílin er 1609,3 metrar, og tað var mett at vera ógjørligt hjá einum menniskja at renna teinin skjótari enn fýra minuttir.

Men Roger Bannister hevði sett sær fyri at gera júst tað.

Á Olympisku leikunum í Helsinki í 1952 setti Bannister bretskt met á 1500 metrum og fekk eitt fjórða pláss.

Hetta styrkti hann í trúnni um, at fyrsta mílin undir fýra minuttir var ein møguleiki.

Royndin var gjørd 6. mai 1954 á Iffley Road breytini í Oxford. Chris Chataway og Chris Brasher skuldu renna part av av teininum saman við Bannister fyri at tryggja røttu ferðina.

Røddin á speakaranum, Norris McWirther, druknaði í fagnaðarrópunum, tá 25 ára gamli Bannister kom á mál og skrivaði søgu.

Tíðin henda dagin í 1954 var 3 minuttir og 59,4 sekund.

Metið hjá Bannister helt bara í 46 dagar, og síðani er tað tikið fleiri ferð.

Bestu tíðina í løtuni eigur Hicham El Guerrouj úr Marokko, sum brúkti 3 minuttir og 43,13 sekund at renna teinin.

Albert Marni Joensen, sum eigur eina rúgvu av føroyskum metum í renning, sigur, at føroyskir rennarar mangan hugsaðu um Roger Bannister, tá teir royndi at renna 1500 metrar undir fýra minuttir.

Eins og Bannister las Albert Marni Joensen medisin um tað mundið, hann rann á hægsta stigi.

Og eins og Bannister brúkti hann sína vitan frá lesnaðinum í renningini.