Tey ungu verja oyruni

10-04-2018

- Ungdómurin er ógvuliga tilvitaður um ikki at fáa niðursetta hoyrn, og tí er ikki óvanligt, at tey ungu brúka hoyrivernd, sigur Jutta Helgadóttir

Umleið 10. hvør føroyingur hoyrir ikki serliga væl.

- Fólk hoyra ikki verri í dag enn fyri eini 10 árum síðani, men sum heild eru øll meira tilvitað um hoyrnina, sigur Jutta Helgadóttir.

Hon er audiologistur og eigur og rekur hoyriklinikkina Hoyrnina.

- Tað er als ikki óvanligt, at ung fólk ynskja at fáa oyruni kannað, og tey eru ógvuliga tilvitað um at brúka hoyrivernd, tá eitt nú tónleikatiltøk eru, sigur Jutta Helgadóttir.

Sambært henni er tað ikki altíð, at ein persónur sjálvur leggur merki til, at hoyrnin er niðursett.

- Ofta eru tað tey avvarandi, sum gera persónin varugan við, at hoyrnin ivaleyst er skerd, sigur Jutta Helgadóttir.

Í morgunsendingini greiddi hon frá føroyingum og hoyrn, og harafturat fortaldi Allan Dalsgarð, hvussu tað er at hava niðursetta hoyrn.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)