Tað gerst alsamt meira vanligt, at alt samskifti millum borgarar og stovnar ella fyritøkur fer fram á netinum.

Tað vil siga, at heldur enn at fáa eitt vanligt bræv í postkassan við einum boðum frá onkrum stovni, so verða boðini send á netinum eitt nú í einum telduposti.

Og júst tað, at ein so stórur partur av slíkum samskifti í dag fer fram á netinum, tað er ein avbjóðing fyri pensjónistarnar í Føroyum.

Tað sigur Beate L. Samuelsen, sum er forkvinna í Landsfelag pensjónista.

- Nógv hava onga teldu, og hava tey teldu, tora tey ikki at brúka hana. Og tey eru rættiliga eym um tey tingini, tey vita og eiga, og tey ynskja ikki, at onnur fólk skulu kunna koma inn á teirra privata økið, sigur Beata L. Samuelsen.

Sambært henni hevur elektroniskt samskifti stóra ávirkan á eldra ættarliðið:

- Tað ger, at tey føla seg uttanfyri, og tey fáa ikki fylgt við í sínum persónligu viðurskiftum, sigur Beate L. Samuelsen.

Í morgunsendingini fortaldi hon, hví tað er ein avbjóðing fyri fleiri pensjónistar, at alsamt fleiri fyritøkur og stovnar samskifta á netinum.