Hann var við til at seta Uriah Heep á stovn í 1969, og hóast tað skjótt eru 50 ár síðani, hevur gittaristurin als ongar ætlanir um at gevast. - Eg kenni meg sera hepnan, sigur hann.

Mick Box hevur frætt, at atgongumerkini til kunngjørdu konsertina í Føroyum vórðu útseld, og at konsertin tí er flutt í Stórhøllina á Hálsi.

- Tað fegnast vit um, og vit eru spentir at koma aftur til Føroya at spæla allar teir kendu sangirnar.

Mick Box minnist væl konsertina í Føroyum í 1990, tá hann lænti víðagitnu topphúgvuna hjá Jens Martin Knudsen.

- Eg helt hon klæddi mær væl. Ikki eins væl og Jens Martini, men eg gjørdi mítt besta, leggur hann brosandi aftrat.

Sum einasti upprunalimur í Uriah Heep, ið framvegis er í bólkinum, hevur hann sæð eina ávísa útskifting.

Hann væntar, at nýggir limir skilja grundtankan við Uriah Heep, sum var grundlagdur í 1970unum, men eisini er gott, at tónleikararnir hava sítt egna ljóð við til heildina.

Men í grundini er tað týdningarmesta góða vinalagið, tí tá vit eru á konsertferð, eru vit sum ein familja.

- Fyri meg hevur tað stóran týdning, at øll, sum eru knýtt at bólkinum, eru væl.

Hvør einstakur hevur sama týdning, og tí fáa limir og hjálparfólk somu viðferð, sigur dámligi gittaristurin.

Konsertin í Føroyum verður í Høllini á Hálsi leygarkvøldið, 22. september.