- Um onkur beyð mær at koma á mánan 14. oktober, so hevði eg takkað nei, tí tá gongur mín størsti dreymur út. Tað skrivaði Rakul Dalsgaard á Facebook.

Hon sipaði til konsertina, sum Shania Twain hevði í Royal Arena í Keypmannahavn í gjárkvøldið.

Rakul Dalsgaard fekk sína fyrstu fløgu við Shania Twain í 1997. Síðani hevur hon verið púra vekk í tónleikinum og ikki minst sjálvari kvinnuni.

Hon dugir allar sangirnar, hevur lisið bøkur og sæð dokumentarsendingar um Shania Twain.

Hon hevur havt hana í oyrunum, bæði tá hon hevur verið hjá tannlækna og til skanning.

Konsertin gekk væl og virðiliga vónunum á møti, sigur Rakul Dalsgaard, sum enn ikki heldur, at hon hevur sodnað stóra upplivingina til fulnar.