- Tíðindi, mentan og ítróttur
Góðan morgun Føroyar
- Influensa er vandamikil og kostar lív á hvørjum ári.
Tað sigur Djóni Joensen, sum er kommunulækni í viðtaluni í Kollafirði.
Hetta er tíðin, tá influensa byrjar at gera um seg, og sambært Djóna Joensen eiga fólk at taka influensu í álvara.
- Eftirsjúka er tað, sum ger, at ein influensa kann verða vandamikil, tí tað er júst eftirsjúka, sum kostar mannalív, sigur Djóni Joensen og heldur fram:
- Eftirsjúka kann ofta vera lungnabruni, sum blívur til ein bakteriellan lungnabruna, og tá er tað vandamikið, sigur Djóni Joensen.
Sambært honum eiga fólk at hugsa um eftirsjúku, tá tey hava influensu:
- Dregur influensan út, ella tú gerst verri fyri eftir eina viku, so skalt tú vita, at tað møguliga kann vera talan um eftirsjúku, sigur Djóni Joensen.
Í morgunsendingini greiddi hann frá um influensu, krími og gav góð ráð.