Samfelagið ger alt ov lítið fyri at hjálpa teimum, sum viga ov nógv. Ovurfiti er í veruleikanum ein kronisk sjúka, og møguleikarnir at sleppa í viðgerð eru als ikki nøktandi, sigur danski yvirlæknin, Jens-Christian Holm.

Hjá børnum er ein røð av fylgisjúkum, ið vit fyrr settu í samband við vaksin fólk, ið kunnu standast av ovurfiti. Høgt blóðtrýst, høgt kolesterol og diabetes 2 teljast millum hesar.

Á føroyaferðini hevur Jens-Christian Holm hann hildið skeið fyri vaksnum, ið viga ov nógv.

Ein teirra er Laila Reynheim. Hon sigur, at hon mest sum hevði givið upp at klænka seg, men nú hevur hon hug at royna aftur.