- Vit hava eingi neyv tøl, men tað er einki at ivast í, at harðskapur og hóttanir eru ein regluligur trupulleiki hjá starvsfólkum, sum arbeiða innan heilsu, røkt og umsorgan.

Orðini eigur stjórin á Arbeiðs- og brunaeftirlitinum, Leivur Persson.

Í dag skipar Arbeiðs-og brunaeftirlitið fyri einum evnisdegi um júst harðskap og hóttanir, og hesin evnisdagurin er ætlaður teimum, sum onkursvegna arbeiða innan heilsu, røkt og hóttanir.

- Sum myndugleiki hava vit eina fatan av, at talan er um ein relativan regluligan, trupulleika innan fyri tey ymisku økini innan heilsurøkt, staðfestir Leivur Persson og heldur fram:

- Í mun til okkaru ítøkiligu tøl, so tosa vit um fleiri tilburðir hvørt ár, men okkara fatan er heilt griett, at tað er ein brøkpartur av harðskapi og hóttanum á arbeiðsplássum, sum verður fráboðaður, sigur Leivur Persson.

Sambært honum er tað ein greið orsøk til, at alsamt fleiri starvsfólk eru fyri harðskapi og hóttanum, í sambandi við arbeiði:

-Tænastustøðið í tí modernaða vælferðarsamfelagnum verður alla tíðina útbygt og veksur, og so eru tað eisini fleiri fólk, sum arbeiða í hesum sektorinum, og tískil eisini fleiri og fleiri fólk, sum uppliva at koma í støður við harðskapi og hóttanum, sigur Leivur Persson.

Endamálið við evnisdegnum í dag er, at seta ljóskastaran á vaksandi trupulleikan við harðskapi og hóttanum á ávísum arbeiðsplássum, og at geva íblástur til, hvussu hesin trupulleiki kann fyribyrgjast og handfarast. Í tí sambandi hevur Arbeiðs- og brunaeftirlitið gjørt eina nýggja vegleiðing, sum kann síggjast her.