Bach í kertuljósi í Kirkjubø

03-12-2018

Í aldargomlu Ólavskirkjuni í Kirkjubø, verður aftur í ár konsert við tónleiki eftir Johann Sebastian Bach

Hósdagin komandi verður stórfingin konsert í Ólavskirkjuni í Kirkjubø, har bert tónleikur hjá Johann Sebastian Bach verður at hoyra.
Hugskotið er komið frá Londonkirkjuni, St-Martin-in-the-Fields, har tey á hvørjum ári hava "Bach in Candlelight."

Ein av stigtakarunum, Johan Mortensen sigur, at kirkjan í Kirkjubø og umhvørvið annars við Múrinum og Roykstovuni, er sera vælhóskandi til júst hetta tiltak.

Tey, ið spæla og syngja í ár, eru Birita Poulsen, sang, Ólavur Jakobsen, gittar og frásøgufólk, Jón Festirstein og Monika Stauss, violin, Jona Jacobsen, viola og Jens Chr. Guttesen, sello.
Konsertin byrjar klokkan 19.30.

Í útvarpsstovuni í morgun sang Birita Poulsen "Eg standi tíni krubbu hjá," sum Hans Andrias Djurhuus hevur týtt til føroyskt. Guitarfylgispælið hevur Ólavur Jakobsen.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)