Fyri trimum árum síðani valdi Meinhard Bjartalíð, prestur, at gera nakað mundagott fyri heilsuna. Ein avgerð, sum hevur havt stóra ávirkan á hansara heilsustøði líka síðani.

- Eg fór til læknan fyri at kanna, hvussu eg sum heild var fyri. Alt sá gott út, líka til eg skuldi upp á vektina. Eg vigaði ov nógv, og tað setti nakrar tankar í gongd, fortelur Meinhard Bjartalíð.

Hetta var beint áðrenn føstuna, sum byrjar í februar ella mars.

- Tí var tað, at eg hugsaði, um eg ikki skuldi royna at fasta í teir 40 dagarnar, sum føstan er, sigur Meinhard Bjartalíð, sum skjótt merkti, at hann fekk tað betri hetta tíðarskeiðið.

- Eg bleiv sum heild betur fyri. Og so lætnaði eg 10 kilo. Harafturat vaknaðu allir sansirnir, og eitt nú merkti eg veruliga svongd aftur, sigur Meinhard Bjartalíð.

Í morgunsendingini í morgun varð sjóneykan sett á menn og teirra heilsu. Í hesum sambandi greiddi Meinhard Bjartalíð frá sínum royndum at fasta.