Leygarkvøldið framførir Føroya symfoniorkestur 9. symfoni eftir Ludvig van Beethoven.

Hetta er ein ógvuliga ambitiøs verkætlan, sum leingi hevur verið í huganum á fólki, ið hava áhuga fyri klassiskum tónleiki.

9. er mest krevjandi symfoniin hjá Beethoven, og tí hevur hetta kravt nógv av øllum pørtum, vísir Poul Jákup Thomsen á.

Nøkur eru fallin frá í tilgongdini, men tað er ein partur av eini so krevjandi verkætlan.

Ólavur Jakobsen, tónleikari, sigur, at tað er nógv, ið ger hetta verkið til nakað heilt serstakt.

Millum annað tað, at Beethoven í veruleikanum var deyvur, tá hann skrivaði symfoniina.

Áhugin fyri konsertini er ovurhondsstórur, og hon bleiv útseld alt fyri eitt. Ólavur Jakobsen fegnast um, at tað eydnaðist at keypa atgongumerki á Rótikassanum á Facebook.

Hetta er ein søgulig hending, nú Føroya symfoniorkestur fer at framføra hetta klassiska verkið, sigur Ólavur Jakobsen.