Ber til at skemta við øllum, ella eru tað onkur evni, sum ikki søma seg til skemt?

Ein maður, sum seinastu árini hevur fingist nógv við skemt og ikki minst er kendur fyri Grillbúðina hjá Símun, er als ikki í iva.

- Tað ber til at skemta við nógvum, men tað er eitt mark. Eitt nú rasismu havi eg ongan hug at brúka í mínum skemti, sigur Gundur Johansen.

Í sambandi við Barnarættindadagar í Norðurlandahúsinum, har børn í 7. flokki verða kunnað um síni rættindi, er Gundur Johansen og hansara skemt eisini partur av skránni.

Gundur hevur gjørt eitt stuttligt innslag burtur úr søguni um drongin, Jákup, sum kemur frá trongum korum, og hevur ymsar trupulleikar at dragast við.

- Onkuntíð haldi eg, at við at gera okkurt stuttligt burtur úr einum álvarsligum evni, so fært tú fólk í fyrstu syftu at flenna, sum jú er ein deilig kensla fyri tey, men seinni fara tey kanska at hugsa meir um álvaran, sum liggur aftanfyri. Tað vil siga, at tey fara at hugsa um eitt evnið, sum tey annars ikki høvdu givið sær far um, sigur Gundur Johansen.

Í morgunsendingini greiddi Gundur Johansen frá, hvussu hann veit, hvat hann vil skemta við, og hvar markið gongur.