Í morgin, leygardagin, er ein serligur altjóða dagur, ið kallast Global Big Day.

Hetta er eitt fuglateljingartiltak har ein og hvør fuglaáhugaður kann vera við.

Svein-Ole Mikalsen og Jórun Pólsdóttir, nevndarlimir í Fuglafrøðifelagnum, eru í útvarpsstovuni.

Svein-Ole, sum er úr Norðurnorra, sigur, at hann altíð hevur verið áhugaður í fugli.

Tey plagdu at hyggja at fuglinum, sum var í urtagarðinum ymsu árstíðirnar.

Hjá Jóruni er øðrvísi. Tað er ikki fyrr enn seinastu árini, at hon veruliga hevur fingið henda áhugan.

- Tað er áhugavert og gott fyri sinni, heldur hon.

Tað er Cornell University , ið skipar fyri hesum altjóða tiltaki.

Tað er einfalt at telja og skráseta í eBird.

How to participate lýsir hvussu hetta verður gjørt.

Tað eru bara trý ting tú skalt minnast til:

- Ger eina kontu á eBird. Hesa skal tú síðani nýta til allar tínar skrásetingar.

- Tú velur eitt øki at telja fugl í, og har telur tú allar teir fuglar, sum tú kennir.

- Tú skrásetur stað, dag og tíð, hvussu langa tíð tú brúkti, og síðani hvat slag av fugli og hvussu nógvir av hvørjum slagi.