Fakfeløg og reiðarí samd um flutningsskipini

Manningarfeløgini nokta ikki longur limum sínum at mynstra við Asbjørn Senior, sum í løtuni virkar sum flutningsskip hjá trolarum, sum fiska makrel og sild.

Tí ólavsøkuafttan gjørdu reiðaríini hjá Asbjørn Senior, tað eitur Ocean Group Faroes, og hjá Grunnabarði, sum South Pelagic leigar frá Thor, sum eigur skipið, og manningarfeløgini, sum høvdu lýst mynstringarbann og stongsul, avtalu um hýrurnar hjá manningunum.

Fríggjadagin gjørdu manningarfeløgini avtalu við fimm onnur reiðarí og samtøk um flutningsskip í uppsjóvarfiskiskapinum.

Hesi reiðarí eru JFK, Varðin, Faroe Origin, North West Pelagic og Framherji. 

Avtalan, sum varð gjørd í gjár millum feløgini og reiðaríini hjá Grunnabarði og Asbjørn Senior er eins og tann, sum varð gjørd fríggjadagin.

Sambært avtaluni fáa flutningsskip, sum ikki hava veiðiloyvi og fiskiloyvi, men bara flutningsloyvi, 34 prosent av søluvirðinum av fiskinum, tey flyta til lands. Skipini, sum lata fiskin, fáa hini 66 prosentini. 

Flutningsskip, sum eisini sleppa at fiska, fáa 40 prosent av søluvirðinum.