Fiskurin ikki etandi staðfestir Vinnukærunevndin

Fiskurin ikki etandi staðfestir Vinnukærunevndin
Vinnukærunevndin hevur staðfest avgerðina hjá Heilsufrøðiligu Starvsstovuni um fiskin hjá Ran, sum ikki kann seljast til matna. Thor onga viðmerking
Ran var á Flemish Cap í vár sum móttøkuskip.
 
24.10.2014 - 12:36

Fiskurin kann metast at bera sjúku ella kann hann gera fólk sjúk, tí fiskurin kann vera dálkaður.

Vinnukærunevndin hevur staðfest avgerðina hjá Heilsufrøðiligu Starvsstovuni um fiskin hjá trolaranum Ran, sum ikki kann seljast til matna.

Avgerðin er grundað á millum annað, at fiskurin er frystur beinleiðis í goymslulastini.

Ítøkiligar umstøður vóru í sambandi við frystingina og landingina av fiskinum, sum hava við sær, at fiskurin kann metast at bera ella kunna vera atvold til sjúku, tí fiskurin kann vera dálkaður. 

Heilsufrøðiliga Starvsstovan vísti til eina ávísa grein í matvørulógini, sum P/f Thor, sum eigur Ran, ikki heldur kann brúkast í hesum førinum. Men tað kann hon, sigur Vinnukærunevndin.

Thor onga viðmerking

Ran og Phønix vóru á Flemish Cap í vár, Phønix fiskaði, og Ran tók fiskin. 

Sambært Thor var toskurin, sum Heilsufrøðiliga Starvsstovan kolldømdi, ov stórur til frystararnar hjá Ran. 

Einastu møguleikar vóru antin at blaka fiskin fyri borð ella frysta hann í lastini. Avgjørt varð at frysta fiskin óinnpakkaðan í lastini.

Gunnbjørn Joensen, stjóri í Thor, sigur í dag, at har hava tey onga viðmerking í løtuni. 

Fiskurin hjá Ran, tey 70 tonsini, sum sambært Heilsufrøðiligu starvsstovuni og Vinnukærunevndini ikki kann brúkast sum matvøra, liggur enn á frystigoymslu.

   

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585