Grisku bankarnir eru framvegis stongdir

Somuleiðis eru avmarkingar í sjálvtøkunum, soleiðis at grikkar bara kunnu taka út 60 evrur um dagin.

Fleiri óttast, at pengagoymslurnar í grisku bankunum eru um at tømast. 

I gjárkvøldi boðaði griski tjóðbankin frá, at tey fóru at senda evropeiska miðbankanum eina formliga umbøn um at fáa fleiri pengar. Støða verður væntandi tikin til umbønina á fundi seinni í dag.

Griski vara-fíggjarmálaráðharrin, Nadia Valavani, segði í gjárkvøldi, at grikkar ikki kunnu rokna við at sleppa framat kontantum pengum, sum tey hava liggjandi í bankaboksum í landsins bankum. Útsøgnin elvdi sum vera man til ørkymlan.

Seinni trekti Valavani tó nakað í land.

Griski fíggjarmálaráðharrin, Yanis Varoufakis, er ikki longur maðurin, sum skal leiða Grikkaland út úr búskaparligu kreppuni.

Varoufakis boðar í morgun frá, at hann leggur frá sær í kjalarvørrinum av fólkaatkvøðuni í gjár, har grikkar søgdu dundrandi nei til krøvini, sum altjóða samfelagið setir landinum fyri at koma illa sperda, griska búskapinum til hjálpar.

Yanis Varoufakis hevur, saman við forsætisráðharranum Alexis Tsipras, staðið á odda fyri samráðingunum, ið griska stjórnin hevur havt við sínar lániveitarar síðstu mánaðirnar. 

Varoufakis sigur seg vera óynsktan í teimum samráðingum, sum skulu fara fram millum Grikkaland og altjóða samfelagið.

Seinni í dag fer týski samveldiskanslarin Angela Merkel til Paris á fund við franska forsetan Francois Hollande at umrøða støðuna. Og í morgin eru stjórnarleiðararnir og fíggjarmálaráðharrarnir í teimum 19 londunum í evro-samstarvinum boðsendir á toppfund.

Sambært eygleiðarum stendur alt opið. 

Úrslitið av grisku fólkaatkvøðuni í gjár varð, at 61,3 prosent av grikkum siga nei, meðan einans 38,7 prosent siga ja.