Ávarar móti flóttafólkapolitikkinum í Danmark

Ávarar móti flóttafólkapolitikkinum í Danmark
Stine Bosse, forkvinna í BankNordik, finst hvassliga at ætlanini hjá integrasjónsráðharranum at herða reglurnar fyri at taka ímóti flóttafólki
Stine Bosse er nevndarforkvinna í BankNordik. Hon hevur drúgvar royndir í donskum vinnulívi
 
27.07.2015 - 12:51

Stine Bosse, forkvinna í BankNordik, leggur seg nú út í kjakið um flóttafólk og innflytarar í Danmark.

Nýggi ráðharrin í integrasjónsmálum, Inger Støjberg, hevur sagt, at stjórnin fer at herða reglurnar fyri at taka ímóti flóttafólki, og hon hevur eisini nevnt møguleikan at lýsa í útlendskum bløðum um herdu tiltøkini.

Stine Bosse, sum eisini hevur drúgvar royndir í vinnulívinum, spyr í tíðarritinum Ræson, hvussu Inger Støjberg ætlar at samskifta við flóttafólk eitt nú úr Sýria, Ukraina, Kongo ella Nigeria. 

Hon spyr eisini, um ráðharrin hevur ómakað sær spurt vinnulívið um málið, nú tørvur er á fólki úr øllum heiminum at koma til Danmarkar at arbeiða, tí kreppan er um at verða av.

Danmark fær fyrimun

Stine Bosse vísir á, at ES hevur gjørt eina ætlan fyri, hvussu limalondini kunnu hjálpa hvør øðrum at loysa flóttafólkaspurningin.

Men Danmark vil ikki vera við, hóast tað bara hevði verið ein fyrimunur, skrivar Stine Bosse.

Færri flóttafólk høvdu komið inn í landið, og stríðst hevði verið ímóti mannasmuglingini, sigur hon.

Eftir situr eitt viðkvæmt Grikkaland við trupulleikanum, sum kann hótta trygdina og støðufestið í ES. Og eftir sita eisini hundrað túsund tals flóttafólk, teirra millum tvær milliónir sýrisk børn.

Søgan fer at minnast

Stine Bosse skrivar, at søgan minnist Danmark fyri at hava bjargað jødum til Svøríkis undir seinna heimsbardaga, men vit fara eisini at minnist tey, sum sótu hendur í favn, meðan kríggið leikaði á í Sýrialandi. 

Tað fara ikki bara danir, men eisini Evropa og allur heimurin at minnast, skrivar nevndarforkvinnan í BankNordik í tíðarritinum Ræson. 

Er kopiera
Nýggjastu sendingar í ÚV
Nýggjastu sendingar í SV
Hósdag 28. mars
Guðstænasta úr Kollafjarðar kirkju
172938
Týsdag 26. mars
Veðrið
172832
Mánadag 25. mars
Beautyvarpið við Tanju
172718
Sunnudag 24. mars
Mein fyri lívið
172652