- Tíðindi, mentan og ítróttur
Eingi ólóglig skotvápn latin løgregluni
Nýggja vápnalógin, ið kom í gildi 1. januar í ár, ásetur, at persónar, sum eiga ella liggja inni við ólógligum skotvápnum, kunnu lata tey inn til Føroya landfúta uttan revsitiltøk. Men bara fram til 30. juni.
- Men enn er einki vápn innlatið, sigur Jan Fossaberg, løgreglumaður. Og talan er um sera vandamikil vápn, sigur Jan Fossaberg hjá løgregluni.
Síðani 1969 hava vandamikil skotvápn, eitt nú riflur og revolvarar, kravt serstakt loyvi frá politinum. Vanligar høglbyrsur hava verið undantiknar hesum loyvi, og verða tað eisini frameftir.
SÍ EISINI Skotvápn skulu nú skrásetast
Hevur tú eitt nú riflu ella revolvara, uttan at hava serstakt loyvi frá politinum, so er talan um ólógligt skotvápn.
Ólógligu vápnini kunnu latast inn á politistøðina í Havn, Klaksvík og Tvøroyri. Høglbyrsa er tó lógligt vápn í Føroyum.
Eigur tú eitt søguligt skotvápn, sum verða mett at hava serligan mentanarsøguligan týdning fyri Føroyar, verður vápnið lati Søvnum Landsins til varðveitslu.