- Tíðindi, mentan og ítróttur
Eingin nýggjur stjóri í TF holding
TF Holding-samtakið hevði tveir stjórar - Regin Hammer, og so Suna Schwarts Jacobsen, sum var forstjóri.
Men nevndarformaðurin í TF Holding, Arni Brattabeg sigur, at tað verður forstjórin, Suni Schwarts Jacobsen, sum einsamallur fer at mynda samtakið í framtíðini.
- Eg dugi ikki at síggja nakra orsøk til at hava tveir stjórar í einum felagið sum TF-Holding, sigur hann við útvarpið.
Ætlanin er at endurskoða allan bygnaðin í samtakinum í heyst, tá nevndin kemur saman aftur eftir summarfrítíðina.
Regin Hammer var eisini stjóri í Tryggingarfelagnum og nevndarformaður í Betri Pensjón.
Tað er nevndin í Tryggingarfelagnum, sum stendir fyri tilgongdini at finna ein nýggjan stjóra til Tryggingarfelagið.
Lars Bonde er formaður í Tryggingarfelagnum Føroyar, og hann sigur, at ætlanin er, at ein nýggjur stjóri verður settur í seinasta lagið fyrst í oktober. Áðrenn nevndin fór í summarfrí, fór hon undir eitt samstarv við headhuntarafyritøkuna, AMROP, sum skal vera við til at finna nýggja stjóran.
Í AMROP eru tey serliga køn innan fíggjarheiminum, og tað er ein føroyingur, sum skal hjálpa Tryggingarfelagnum við at finna rætta stjóran, sigur Lars Bonde, sum umframt at vera nevndarformaður í Tryggingarfelagnum Føroyar, er stjóri í samtakinum TRYG Danmark.
Tryggingarfelagið fer fyrst og fremst at leita eftir einum nyggjum stjóra millum føroyingar her heima og uttanlanda, sigur Lars Bonde. Viðkomandi skal búgva í Havn, tá hann tekur við.