Nógv skerd Føroyanevnd á vitjan

Nógv skerd Føroyanevnd á vitjan
Bara níggju av teimum 29 nevndarlimunum vera við í ferðini, sum byrjar næsta sunnudag
Sjúrður Skaale er formaður í Føroyanevndini
 
07.08.2016 - 16:39

Føroyanevndin hjá fólkatinginum kemur til Føroya á vitjan frá 14. til 18. august, men tað vera ikki so nógv í ferðalagnum hesaferð, tí júst teir dagarnar, nevndin er í Føroyum, hevur fólkatingið fund, m.a. um danska lutin í einum altjóða tiltaki í Libya, har kemisk vápn skulu beinast burtur.

Tí hevur formaðurin í Føroyanevndini, Sjúrður Skaale, fingið nógv avboð. 

Níggju nevndarlimir hava teknað seg til ferðina, og tá eru báðir føroysku fólkatingsmenninir taldir við. Við embætisfólkum verða 14 fólk í ferðalagnum. 

Kunnað um Sandoyartunnilin

Føroyanevndin fer at vitja í Sandoynni, Klaksvík, og í Havn.

Í Sandoynni vitjar nevndin m.a. Grótvirkið í Skopun og Listasavnið á Sandi, og nevndin verður kunnað ætlaða Sandoyartunnilin.

Í Havn fer Føroyanevndin m.a. at síggja vindmyllulundina hjá SEV í Húsahaga, og fundir verða við Aksel V. Johannesen, løgmann, og uttanlandsnevndina hjá løgtinginum.

LGBT og Fargen

Nevndin fer at hitta umboð fyri LGBT-felagsskapin, og vitjað verður á Landssjúkrahúsinum, har m.a. verður kunnað um Fargen-verkætlanina.

Eisini verður kjakfundur við politisku ungmannafeløgini um ríkisfelagsskapin. 

Føroyanevndin fer eisini at vitja arrestina í Mjørkadali.

Í Klaksvík fer Føroyanevndin m.a. at vitja fiskivinnufyritøkuna Kristian í Grótinum og bryggjaríið Føroya Bjór. 

Býta formanssessin millum sín

Fólkatingsmenninir Sjúrður Skaale og Magni Arge hava avtalað at býta formanssessin í Føroyanevndini ímillum sín í valskeiðnum. Tað merkir, at Magni Arge verður formaður um eitt ár ella so. 

Tilsamans eru 29 limir í Føroyanevndini í fólkatinginum. 

 

Er kopiera
Nýggjastu sendingar í ÚV
Fríggjadag 29. mars
Úr Koltri til Kirkjubøar (2:2)
172480
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Fríggjadag 29. mars
Guðstænasta úr Hvannasunds kirkju
172949
Hósdag 28. mars
Skírhósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584