Áhugin fyri oljuleiting í Grønlandi minkar

Tá freistin at bjóða upp á leitingina var farin 15. desember, var eingin umsókn komin. Og landsstýrisformaðurin, Kim Kielsen, sigur eisini, at oljan fer ikki at fíggja sjálvstýrið í Grønlandi. Hann hevur svarað einum fyrispurningi frá Demokratunum í landstinginum.

Stjórin í almenna grønlendska oljufelagnum, Nunaoil, Hans Kristian Olsen, sigur við Sermitsiak, at orsøkin til lítla áhugan fyri olju- og gassleitingini er, at oljuprísurin er so nógv fallin. Og oljufeløgini hava ikki so góð ráð at leita í økjum, har trupult er at finna olju og gass, sigur hann.

Í juni 2014 kostaði ein tunna av Norðsjóvarolju 114 dollarar. Eitt hálvt ár seinni var prísurin fallin niður í 54 dollarar. Í januar í fjør var oljuprísurin komin niður í 29 dollarar fyri tunnuna, men í løtuni kostar Norðsjóvaroljan 55 dollarar.

Í 2015 brúktu oljufeløgini 20 prosent minni til leiting enn árini fyri.