Trump noktaði miðlum á tíðindafund

Umboðini hjá eitt nú CNN, The Los Angeles Times, BBC, The Guardian og New York Times vórðu vend í hurðini, tá tíðindafundur var í Hvítu Húsunum í gjár.

Meðan hesir miðlarnir noyddust at bíða uttanfyri, sluppu NBC, ABC, CBS og Fox News sluppu á fund við amerikanska forsetan.

Nakrir miðlar - eitt nú AP, Time Magasine og USA Today - boykottaðu tíðindafundin, tá teir frættu, at umboð fyri forsetan gjørdu mismun á miðlunum.

CNN átalar

CNN hevur longu gjørt vart við sína ónøgd:

"Hendan gongdin í Trump Hvítu Húsunum kann ikki góðtakast. Hetta er eftir øllum at døma hevndin, tá tú sigur frá tí veruleika, sum teimum ikki dámar. Vit halda fram at siga frá - óansæð, stendur í eini fráboðan, sum CNN hevur sent út á sosialu miðlunum.

Nakrar tímar undan tíðindafundin hevði forsetin funnist at miðlunum, tá hann helt røðu á eini privatari ráðstevnu.

"Teir eru fólksins fíggindar, tí teir hava ongar keldur, segði Trump á ráðstevnuni. "Teir finna bara uppá, tá teir ongar keldur hava, segði amerikanski forsetin.