- Tíðindi, mentan og ítróttur
Arbeiðsmarknaðardepil stovnast
Mentamálaráðið, Almannamálaráðið og Samferðslumálaráðið arbeiða við einum arbeiðsmarknaðardepli.
Hetta er ein skipan, sum tey hava í grannalondunum, har sum myndugleikarnir og partarnir á arbeiðsmarknaðinum byggja vælferðarskipanir upp í felag.
Í Føroyum kann samstarv til dømis gerast um pensjón, ALS, barsilsskipan og lívlanga læru, segði formaðurin í Javnaðarflokkinum, Aksel V. Johannesen, løgmaður, á eykalandsstevnu Javnaðarfloksins leygardagin.
Hugskotið ikki nýtt
Hetta er eitt gamalt hjartamál hjá Javnaðarflokkinum, sum landsstýrisfólkini hjá flokkinum nú arbeiða við.
Fyri góðum fimm árum síðani hevðí Eyðgunn Samuelsen, sum tá var løgtingskvinna í andstøðu, uppskot til samtyktar um at stovna arbeiðsmarknaðardepil, sum samskipaði verandi og komandi skipanir á arbeiðsmarknaðinum.
Arbeiðsmarknaðardepilin skuldi vera eitt stað, har sum arbeiðsgevarar, fakfeløg og politisku myndugleikarnir arbeiddu saman um millum annað útbúgving fyri ófaklærd og tilkomin, sum ikki hava aðra skúlagongd enn fólkaskúlan. Men Løgtingið feldi uppskotið.