- Tíðindi, mentan og ítróttur
Nærkast tveimum milliardum
Facebook kunngjørdi mikudagin ein góðan roknskap. Yvirskotið var beint omanfyri tríggjar milliardir dollarar, svarandi til umleið 20 milliardir krónur.
Samstundis nærkast talið á brúkarum á Facebook einum søguligum hornasteini. Tí skjótt eru tvær milliardir fólk á stóra, sosiala miðlinum.
Vøksturin hjá Facebook hevur hetta síðsta árið verið 17 prosentstig størri enn árið frammanundan. Tað skrivar tíðindastovan hjá Ritzau.
Gongur væl fíggjarliga
Fíggjarliga gongur eisini væl hjá Facebook í løtuni. Umsetningurin hjá Facebook var omanfyri átta milliardir dollarar fyrstu tríggjar mánaðirnar í 2017.
Tað er nakað meira enn greinarar høvdu mett frammanundan. Mett varð, at sølan hjá Facebook fór at liggja um 7,84 milliardir fyrsta ársfjórðingin í ár.
Umsetningurin hjá Facebook vaks 49 prosent samanborið við somu tíð í fjør. Yvirskotið vaks hetta tíðarskeiðið við 76 prosentum, sambært tíðindastovuni, Ritzau.