Ongan skund at broyta mistak í lógini um rúsevni

30.08.2017 - 07:10
Aktuelt112
Ongan skund at broyta mistak í lógini um rúsevni
Nú eru 20 mánaðir siðani føroyskir myndugleikar spurdu í Danmark. Har arbeiða tey enn við málinum.
Heimskendi sangarin Kris Kristofferson hevur kent sviðan av mistakinum í lógini. Hann góðtók at rinda sekt fyri at hava við sær marjuana til Føroya. Men mál hansara skuldi kortini í rættin.
 
 

Danir hava ongan skund at rætta eitt mistak, sum kom í lógina um rúsevni, seinast hon varð broytt. 

Tað er lógin, sum er galdandi í Føroyum.

Tað tekur tíð at fáa lógina broytta so ikki er neyðugt hjá fútanum at fara í Føroya rætt við hvørjum einasta sektaruppskoti, hóast tann, sum hevur fingið uppskotið, játtar seg sekan og vil gjalda sektina.

Hetta kom í lógina, seinast hon varð broytt.

Fútin hevur fyri langari tíð síðani gjørt vart við mistakið.

Spyr í januar 2016

Heilsu- og Innlendismálaráðið gjørdi vart við málið í Danmark fyrst í 2016, men enn er eingin lógarbroyting á veg, sæst í innliti, sum Útvarpið hevur fingið frá Heilsu- og Innlendismálaráðnum.

Broytingin skal koma úr danska Løgmálaráðnum, tí lógin er donsk.

Hálvt annað ár eftir, at Heilsu- og Innlendismálaráðið heitti á danska myndugleikar um at broyta lógina, er einki uppskot komið úr Danmark.

Hetta var í mars í fjør. 

Heilsu- og Innlendismálaráðið rykti eftir svari í apríl, mai og juni.

Svar í juni

Ikki fyrr enn tá, fyrst í juni í fjør, kom svar úr Danmark. 

Danska Heilsumálaráðið svaraði tá, at tað hevði sama dagin biðið Løgmálaráðið siga sína hugsan um málið.

Fyrst í september spyr Heilsu- og Innlendismálaráðið aftur um málið.

Danska Heilsumálaráðið svarar, at tað hevur spurt í Løgmálaráðnum.

Tað svarar ein mánað seinni, fyrst í oktober, at tað svarar væntandi fyri árslok.

Nú er vit so í februar í ár. Enn eina ferð spyr Heilsu- og Innlendismálaráðið um málið.

Framvegis eingin broyting 

Danska Løgmálaráðið arbeiðir framvegis við tí, er svarið úr danska Heilsumálaráðnum. 

6.juni var fundur millum heilsumálaráðini í Føroyum og Danmark.

Tá varð upplýst, at Løgmálaráðið arbeiðir við fleiri loysnum.

Løgmálaráðið sigur nú, at neyðugt er at broyta rættargangslógina, tí talan er um revsing.

11.august spyr Heilsu- og Innlendismálaráðið aftur eftir málinum.

23.august svarar Heilsumálaráðið í Danmark, at tað hevur spurt Løgmálaráðið.

Og her er so málið nú.  

 

 

 

 

 

 

Nýggjastu sendingar í ÚV
Mikudag 26. september
Morgunlestur mikudagur 26. september 2018
85419
Týsdag 25. september
Tematýsdagur um tað góða arbeiði
85762
Týsdag 25. september
Áðrenn Elvis 25 septembur 2018
85752
Týsdag 25. september
HB vann FM í Klaksvík
85729
Týsdag 25. september
Sunnudagstónar 23. september 2018
85728
Nýggjastu sendingar í SV
Mánadag 24. september
3-2
85719
Sunnudag 23. september
Andaktin
85659
Týsdag 18. september
25 minuttir: Todi Jónsson
85504
Mánadag 17. september
3-2
85464
Sunnudag 16. september
Guðstænasta úr Vesturkirkjuni
85398