- Tíðindi, mentan og ítróttur
Aðalverkfall í Katalonia í dag
Fakfeløg og feløg hava boðað frá aðalverkfalli, sum aftursvar til álvarsligu brot á rættindi og frælsi, tá fólkaatkvøðan varð hildin sunnudagin. Tað skrivar BBC í morgun.
Spanska stjórnin í Madrid sigur, at fólkaatkvøðan er ólóglig. Kortini vóru meira enn 2,2 miljónir fólk á vali.
Fingu løstir
Men hundraðtals fólk fingu løstir, tá løgreglan royndi at steðga fólkaatkvøðuni.
Nøkur løgreglufólk royndu at forða fólki í at atkvøða við at skjóta við gummikúlum og herja á valhøli og reka fólk á dyr. 33 løgreglufólk fingu løstir sunnudagin, siga katalanskir heilsumyndugleikar.
Aðalverkfallið í dag er aftursvar til harðskapin, og tað fer at raka almenna flutningskervið, skúlar og stovnar í allan dag.
Víðagitna fótbóltsliðið í Barcelona fer eisini í verkfall, hóast liðið eftir skránni ikki skal spæla nakran dyst í dag, - og tað fara lærdu háskúlarnir og søvnini fyri samtíðarlist í Katalonia eisini, skrivar BBC.
Madrid hóttir
Í meðan royna landsins politikarar at finna gongda leið fram.
Katalonski forsetin, Carler Puig-demont, sigur, at hann vil hava størri viðurkenning frá stjórnina í Madrid. Men stjórnin við Mariano Rajoy, forsætisráðharra, á odda, hevur ávarað um, at sjálvsavgerðarrætturin, sum Katalonina hevur, kann verða tikin frá teimum aftur.
Katalonsk embætisfólk siga, at nærum 90 prosent av veljarunum tóku undir við loysing, men vallutøkan var lutfalsliga lág, 42 prosent, og tað ger støðuna hjá Carler Puig-demont veikari.
Tom Burridge, journalistur hjá BBC í Barcelona, sigur, at tá hugsað verður um ruðuleikan, sum valdaði undir fólkaatkvøðuni, eigur vallutøkan og atkvøðutalið at takast við fyrivarni.