Kærdu hvønn annan fyri somu orð - Føroya besta

05.10.2017 - 07:50
AktueltTøkni
Kærdu hvønn annan fyri somu orð - Føroya besta
Føroya Tele og Vodafone hava fingið bæði ávaring og átalu frá Brúkaraumboðnum fyri ikki at skjalprógva, at teirra tænasta er Føroya besta
Kappingin er harðnað nógv á føroyska telemarknaðinum síðani telefonirnar sóu soleiðis út.
Mynd: Savnsmynd  
 
 

Bæði Føroya Tele og Vodafone hava fingið átalu og ávaring frá Brúkaraumboðnum fyri lýsingar.

Uttan skjalprógv hava báðir veitarar brúkt orðini Føroya besta í lýsingum, Føroya Tele um 4G og farnet og Vodafone um sjónet.

Brúkaraumboðið er komið uppí, tí Føroya Tele hevur kært Vodafone fyri at brúka orðini Føroya besta, og Vodafone hevur kært Føroya Tele fyri at brúka orðini Føroya besta. 

Brúkaraumboðið bað báðar fyritøkur skjalprógva, at uppáhaldið um Føroya besta í lýsingunum er rætt.

Hvørgin hevur svarað Brúkaraumboðnum við nøktandi skjalprógvum, sigur Brúkaraumboðið.

Ikki meldað

Hetta er brot á lógina um markanaðarføring, sum kann meldast til politiið og geva sekt.

Men í hesum føri er tað tó ikki gjørt.

Tá báðir teir stóru fjarskiftisveitararnir hava mál hjá Brúkaraumboðnum um tað sama hjá hvørjum øðrum, verða málini ikki fráboðað løgregluni á hesum sinni.

Men bæði Føroya Tele og Vodafone fáa átalu og ávaring, sigur Brúkaraumboðið.

Brúkaraumboðið sigur, at skjalprógv, sum kunnu brúkast sum prógv fyri orðini Føroya besta, eiga at vera grundað á tað, sum uttanveltaðir myndugleikar við viðurkendum fakligum førleikum hava sagt ella kannað.

Nýggjastu sendingar í ÚV
Nýggjastu sendingar í SV
Mikudag 18. oktober
Hetjur í hæddunum
Mánadag 16. oktober
3-2
Sunnudag 15. oktober
Andaktin
Sunnudag 15. oktober
Møti úr Frelsunarherinum
Hósdag 12. oktober
Kendir føroyingar: Kjølbro