- Tíðindi, mentan og ítróttur
Synagogan í Gøteborg álopin
Jødiska synagogan í Gøteborg var álopin við bensinbumbum í gjárkvøldið, men tað eydnaðist ikki teimum 20 álopsfólkunum at seta eld á bygningin.
Hildið verður, at álopið skal setast í samband við avgerðina hjá amerikanska forsetanum Donald Trump at viðurkenna Jerusalen sum høvuðsstað Ísraels.
Fríggjadagin var eitt mótmælistiltak í Malmø, har 200 fólk savnaðust at mótmæla viðurkenningini, og har hoyrdust eisini hatursróp ímóti jødum. Mótmælistiltakið og álopið á synagoguna - hava fingið politikarar at tala at.
Svenski forsætisráðharrin Stefan Løfven sigur seg vera skelkaðan.
Øll skulu kenna seg trygg
- Pláss er ikki fyri antisemitismu í svenska samfelagnum, sigur hann, og vil hava at tey verða revsað, ið hava ábyrgdina av álopunum.
- Øll tey, ið virða fólkaræðið, mugu standa saman um eitt opið og frísinnað samfelag, har øll kenna seg trygg, sigur forsætisráðharrin.
Tað sama siga Margot Wallstrøm, uttanríkisráðharri, Jan Björklund leiðari í Liberala flokkinum og Annie Lööf, forkvinna í Centerpartiet.
- Hetta, ið gjørt er, kann als ikki góðtakast, siga tey.
- Hóttanir og harðskapur eiga ikki pláss í okkara samfelag, sigur uttanríkisráðharrin um álopið á synagoguna í Gøteborg og hatursrópini í Malmø ímóti jødum.
Eftir álopið á synagoguna í Gøteborg hevur svenska løgreglan styrkt vaktarhaldið har og við aðrar synagogur - millum aðrar hana í Malmø.
-----