Sonja Jógvansdóttir er óviss

12.12.2017 - 09:08
AktueltPolitikkur
Sonja Jógvansdóttir er óviss
Eftir at tingið í gjár hevði felt uppskotið hjá Sonju Jógvansdóttir, uttanflokkatingkvinnu, segði hon, at hon umhugsaði støðuna
Mynd: Savnsmynd  
 
 

Fiskivinnunýskipanaruppskotið hjá samgonguni kemur til triðju og endaligu viðgerð í tinginum í dag, men í løtuni er ógreitt, um uppskotið fær nóg nógvar atkvøður at verða samtykt.

Eftir at tingið í gjár hevði felt uppskotið hjá Sonju Jógvansdóttir, uttanflokkatingkvinnu, um at limagjald til fakfelag kann dragast frá í skatti, segði hon, at hon umhugsaði støðuna.

- Eg má fara heim at umhugsa støðuna, tí eg havi gjørt nakrar avtalur við samgonguna, og hetta er ikki fyrsta avtalan, sum tey bróta. Eg má bara fara heim at hugsa um tað, segði Sonja Jógvansdóttir stutt eftir, at uppskotið hjá henni fall í tinginum. 

Tann avgerandi atkvøðan

Sonja Jógvansdóttir er stuðul hjá samgonguni og tann avgerandi atkvøðan, og hon hevur sagt, at tað er ein avtala, at samgongan skuldi taka undir við einum uppskoti um, at limagjald til fakfelag skal kunna dragast frá í skatti.

Eftir øllum at døma hevði samgongan ikki lagt upp fyri, at uppskotið hjá Sonju Jógvansdóttir kundi falla í tinginum í gjár, hóast Miðflokkurin í fíggjarnevndini var partur av meirilutanum, sum mælti til at samtykkja tað.

Miðflokkurin broytti meining

Kristin Michelsen í Javnaðarflokkinum, sum hevur verið burturstaddur, var heldur ikki í tinginum í gjár.

Tá atkvøtt varð, hálsaði Miðflokkurin um og atkvøddi ímóti, og so vóru 16 atkvøður fyri og 16 ímóti. Sostatt fall uppskotið.

Sonja Jógvansdóttir sigur, at hetta er ikki fyrstu ferð, at samgongan ikki heldur avtalur:

- Tað vísir seg bara, at tað er øgiliga trupult at gera avtalur við løgmann um nakað sum helst, tí hann klárar einki at levera, segði Sonja Jógvansdóttir við Kringvarpið í gjárkvøldið.

Løgmaður ovfarin

Aksel V. Johannesen, løgmaður og samgonguleiðari, viðgongur, at støðan í tinginum í gjár kom óvæntað, men hann roknar ikki við, at tað fer at ávirka úrslitið av atkvøðugreiðsluni um fiskivinnunýskipanina í dag.

- Eg má siga, sum er, at eg skuldi havt sæð tað komið, men tað gjørdi eg ikki, segði løgmaður aftaná atkvøðugreiðlsuna. 

Væntandi fer andstøðan at leggja fleiri broytingaruppskot fram við 3. viðgerð í dag, og tað er eisini hugsandi, at Framsókn fer at koma við onkrum broytingaruppskoti, tí flokkurin heldur, at eitt nú menningarkvoturnar eru ov stórar. 

Tingfundurin í dag byrjar klokkan 10 fyrrapartin, og triðja viðgerð av fiskivinnunýskipanini er fyrsta mál á skránni. 

Nýggjastu sendingar í ÚV
Týsdag 23. januar
Tematýsdagur um Korea
76793
Mánadag 22. januar
Við Tórði á túri á Oyrareingjum
76755
Mánadag 22. januar
Norðurljóð 22.januar 2018
76753
Mánadag 22. januar
Á Quiztinum, 1. innleiðandi umfar
76747
Mánadag 22. januar
Meg Minnist: Jón Rasmussen (1:2)
76734
Nýggjastu sendingar í SV
Mánadag 22. januar
3-2
76765
Sunnudag 21. januar
Andaktin
76724
Sunnudag 21. januar
Møti úr Hebron á Argjum
76720
Fríggjadag 19. januar
Lyst 2
76671
Hósdag 18. januar
Archibald Black, við føroyskum teksti
76646