Neyvari reglur í kunngerð um listafólkaløn

Fólk kunnu nú fáa listafólkaløn í níggju ár út í eitt, tað eru tríggar ferðir trý ár.

Kunngerðin um Mentanargrunn landsins er broytt, so parturin, sum eitur listafólkaløn, er vorðin neyvari.

Endamálið við listafólkalønum er at bøta um korini hjá yrkislistafólkum, sum burturav arbeiða við list. 

Yrkislistafólk eru tey, sum hava lokið viðurkenda yrkisfakliga útbúgving, ella hava samsvarandi royndir á listaliga økinum.

Faknevndir

Nevndin fyri Mentanargrunnin setir faknevndir, sum viðgera umsóknirnar um listafólkalønir, og gera tilmæli.

Í faknevndunum eru fólk, sum hava útbúgving í ávísu listaøkjunum.

Aðrar broytingar eru eisini gjørdar í kunngerðini.

Í upprunaligu kunngerðini, sum kom í 2000, stendur, at stuðul kann latast til fløgur.

Nú stendur, at stuðul kann latast til tónleikaútgávur.  

Og nú eru roknskapur og frágreiðing um stuðlaða verkætlan treyt fyri nýggjari tilsøgn um stuðul.