Forsætisráðharrin endurtekur seg sjálvan

25.12.2017 - 13:06
AktueltPolitikkur
Forsætisráðharrin endurtekur seg sjálvan
Aðrar lógir, ikki minst grundlógin, eru oman fyri eina møguliga føroyska stjórnarskipan
Lars Løkke Rasmussen endurtekur, at ein føroysk stjórnarskipan er undir grundlógini.
 
 

Verður føroyska stjórnarskipanin samtykt á einari fólkaatkvøðu, merkir tað í sjálvum sær ikki loysing frá Danmark.

Tað endurtekur Lars Løkke Rasmussen, forsætisráðharri, í svari beint fyri jól til Sjúrð Skaale, fólkatingsmann.

Forsætisráðharrin vísir til kunningina, sum hann sendi Føroyanevndini hjá fólkatinginum í august og í november í ár.

Sambært henni er danska stjórnin vís í, at stjórnarskipanin setir ikki grundlógina til viks. 

Grundlógin nummar eitt

Grundlógin verður framvegis galdandi í Føroyum, hóast stjórnarskipanin verður samtykt. Og grundlógin verður oman fyri stjórnarskipanina.

Hetta verður bara broytt, um føroyingar gera av at loysa frá Danmark og tað skal gerast sambært grundlógini.

Tað merkir, at fólkatingið skal góðkenna, at Føroyar fara úr ríkinum. 

Víkir fyri øðrum lógum

Danska Løgmálaráðið sigur harafturat, at stjórnarskipanin noyðist at víkja fyri øðrum lógum, so sum grundlógini, heimastýrislógini og yvirtøkulógini, um tað kemur til skarpskeringar.

Tá hevur stjórnarskipanin ongan rættarvirknað. 

Lars Løkke Rasmussen endurtekur, at danska stjórnin sjálvandi fer at virða ein avgerð hjá føroyska fólkinum um, at Føroyar gerast sjálvstøðugur statur. Tað fara flokkarnir í fólkatinginum eisini at gera.

Hetta er eisini galdandi, um stjórnarskipanin verður vrakað á fólkaatkvøðu í Føroyum.

Nýggjastu sendingar í ÚV
Týsdag 23. oktober
Áðrenn Elvis 23. okt. 2018
86769
Týsdag 23. oktober
Morgunlestur týsdagur 23. oktober 2018
86642
Mánadag 22. oktober
Víð Tórði á túri í Tindhólmi
86722
Mánadag 22. oktober
Norðurljóð 22.oktober 2018
86720
Mánadag 22. oktober
Sunnudagstónar 21. oktober 2018
86715
Nýggjastu sendingar í SV
Týsdag 23. oktober
25 minuttir: Cecilia Jacobsen
86755
Mánadag 22. oktober
3-2
86730
Sunnudag 21. oktober
Guðstænasta úr Christianskirkjuni
86685
Leygardag 20. oktober
Andaktin
86655
Fríggjadag 19. oktober
Lyst 17
86618