- Tíðindi, mentan og ítróttur
Norður- og Suðurkorea hittast
Fundurin er ein roynd at bøta um spentu viðurskiftini, landanna millum.
Sambært suðurkoreansku stjórnini hevur Norðurkorea góðtikið innbjóðingina, og tí verður fundurin veruleiki.
Eitt punkt á skránni fyri fundin verður norðurkoreanska luttøkan til komandi vetrar-OL í Suðurkorea. Olympisku vetrarleikirnir verða hildnir í býnum Pyeong-Chang 9. til 25. februar.
Fyrr í vikuni lat Norðurkorea uppaftur eina samskiftislinju til Suðurkorea - linjan hevur annars verið stongd í áravís.
Í gjár avtalaðu suðurkoreanski forsetin, Moon Jae-in, og amerikanski forsetin Donald Trump, at útseta stórar, felags hernaðarvenjingar til aftaná olympisku vetrarleikirnar.
Felags amerikansku og suðurkoreansku hernaðarvenjingarnar í økinum hava javnan fingið øði í norðurkoreanska leiðaran, Kim Jong-un.