- Tíðindi, mentan og ítróttur
Vænta fleiri skip á Fiskamarknaðinum
Línuskipini á Flemish cap, sum hava fingið væl av fiski, hava verið inni og landað. Fiskurin verður sendur til Fiskamarknaðin í bingjum.
Fiskað verður eisini aðrastaðnis enn á Flemish cap.
Fiskamarknaðurin væntar fleiri línuskip koma at landa í næstu viku.
Skipini royna á Íslandsrygginum, á djúpum vatni og inni á grunninum.
Útróðrarbátarnir, sum plaga at landa, hava góðan streym í løtuni, meðan veðrið næstu dagarnar væntandi ikki verður tað besta.
Vikan er tó ikki burturspilt hjá útróðrarfólkinum, tí seinni í vikuni verður hampiligari veður.
Djúphavstrolararnir fiska upsa og blálongu og væntast at landa síðst í næstu viku.
Flestu partrolararnir eru eisini til fiskiskap og landa væntandi eisini tá næsta vika fer at líða.
Fimm trolbátar eru norðanfyri og fiska tosk og hýsu og nakað av flatfiski. Teir landa væntandi fyrst í komandi viku.
Garnaskipini royna eftir svartkalva, men sambært Fiskamarknaðinum er so sum so við fiskiskapinum, og tí er ilt at siga, nær tey landa.