- Tíðindi, mentan og ítróttur
DNO keypir fyri 600 milliónir av Faroe Petroleum
Oljufelagið DNO hevur í dag keypt part av Faroe Petroleum fyri 600 milliónir danskar krónur. Tað skrivar heimasíðan E-24.
Og fyri hesar 600 milliónirnar fær DNO 15,37% av partabrøvunum í Faroe Petroleum.
DNO, sum millum annað eigur í leitiloyvum í Bretlandi, Noregi og í Irak, ætlar sær at vaksa um sítt virksemi í Norðsjónum.
Í fráboðan um keypið sigur felagið, at tað hevur keypt part í Faroe Petroleum við framtíðini í huga. Faroe Petroleum hevur málrættað sítt virksemi til leiting í Noreg og Bretlandi.
Og tað var eisini í morgun, at Faroe Petroleum boðaði frá, at tey og teirra samstarvsfelagar hava funnið gass í Iris og Hades-brunnunum í Norðurhavi.
Sysla Offshore skrivar, at talan kann vera um serstakliga stórar nøgdir.
- Hetta kann vera ein tann størsta nøgdin, sum funnin er í Norðurhavi seinastu árini, sigur Eldbjørg Vaage Melberg frá norska Oljudirektorarinum.
- Bæði úrslitini eru betri, enn vit høvdu væntað frammanundan, og hetta styrkir okkara støðu, sum longu ER góð í Norðurhavi, sigur Helge hammer, stjóri í Faroe Petroleum í Norra, sambært Sysla Offshore.
OMW Norge hevur 30 prosent av verkætlanini, Faroe Petroleum 20 prosent, Statoil 40 og Spirit Energy 10 prosent.
Tað var Deepsea Bergen, sum boraði, skrivar Sysla Offshore.